Turine og Augon Kåsa på Vik mellom Fjone og Treungen har søkt om byte for dei to ungane før, og fått avslag. Systra til Turine fekk medhald av Fylkesmannen i fjor. Ekteparet søkte på nytt, av sosiale og pedagogiske grunnar, men formannskapet sa nei fordi då ville det bli for få elevar att. Det er å vente at Turine og Augon Kåsa klagar, og at saka kjem Fylkesmannen i hende. Ordførar Anna Nora Dahle,som sjølv er frå Fjone, var svært misnøgd med rådmannen og administrasjonen i innstillinga i Kåsa-saka, og etterlyste ei slik utgreiing som formannskapet hadde bedt om. Rådmannen fekk altså kritikk for at sakutgreiinga hadde enda med medhald for foreldra, av sosiale årsaker. I fjor flytta ei belgisk familie frå Fjone til Treungen, og dermed er elevtalet på Fjone i ferd med å bli om lag som på Felle, der det går 7 elevar. I ei anna sak fekk søkarane medhald. Foreldra er skilte, der den eine bur på Felle og den andre i Nissedal. Dermed blir det meir praktisk at 11-åringen og 1.klassingen går i Treungen, med annankvar veke hos kvar av foreldra. Dette sa formannskapet seg samd i. Biletet: Fjone skule.